ក្រុមអធិរាជស Real Madrid កំពុង​ឈាន​មុខ​គេ​ក្នុង​ការ​ចុះ​ហត្ថលេខា​លើ​ខ្សែ​បម្រើ​ឆ្នើម Bernardo Silva របស់ក្រុមមេឃខៀវ Manchester City ដោយរូបគេ​បានដើរ​តួយ៉ាង​សំខាន់​ក្នុង​ជំនួបវគ្គ ៨ ក្រុមចុងក្រោយនៅ UCL ទល់នឹងក្រុម Real Madrid ថ្មីៗនេះ បើទោះជា Man City បានបរាជ័យក៏ដោយ។

គួរកត់សម្គាល់ថា អតីតខ្សែប្រយុទ្ធ Monaco ស៊ុតបញ្ចូលទីបាន ៦៦គ្រាប់ ក្នុងការបង្ហាញខ្លួន ៣៤៨លើក សម្រាប់ក្រុម Man City ចាប់តាំងពីឆ្នាំ ២០១៧ ដោយរួមចំណែកឲ្យមិត្តរួមក្រុមស៊ុតបញ្ចូលទីបាន ៦១ដង និងបានវិវត្តន៍ខ្លួនក្លាយជាខ្សែបម្រើដ៏មានទេពកោសល្យល្អបំផុតមួយរូបនៅទ្វីបអឺរ៉ុបផងដែរ។

យ៉ាងណាមិញ បំណងប្រាថ្នារបស់ Silva គឺចង់ចាកចេញពី Man City ត្រូវបានគេដឹងមួយរយៈមកហើយ បើទោះបីជាគាត់បានបន្តកិច្ចសន្យាជាមួយក្លឹបរហូតដល់ឆ្នាំ ២០២៦ កាលពីឆ្នាំមុនក៏ដោយ ប៉ុន្តែកិច្ចកិច្ចព្រមព្រៀងដោះលែង មានតម្លៃប្រមាណ ៥០លានផោន។ យោងតាមសារព័ត៌មាន Daily Star បានបញ្ជាក់ថា ក្លឹបយក្សចំនួន ៥ កំពុងតាមដានយ៉ាងដិតដល់អំពីស្ថានភាពរបស់ Silva នៅរដូវក្តៅនេះ ប៉ុន្តែបច្ចុប្បន្ន Real Madrid កំពុងឈានមុនគេក្នុងការនាំយករូបគេមកកាន់ទឹកដី Santiago Bernabeu៕