ខ្សែបម្រើក្លឹបមាន់ខ្នាយមាស Tottenham Hotspur គឺ Dejan Kulusevski បានបញ្ជាក់ថា គ្រាទៅឈរជើងឲ្យ Juventus មួយរយៈមុននោះ ជាពេលវេលាដែលខ្លួនយល់ថាអាម៉ាស់បំផុតក្នុងអាជីព។ យើងសារថយក្រោយកីឡាករស៊ុយអែតរូបនេះ ដើមឡើយលេងឲ្យ Atalanta មុនត្រូវបានសេះបង្កង់ទិញយកនៅរដូវរងា ឆ្នាំ ២០២០។
ស្ថិតិរបស់គេច្រើនឆ្នាំ មុនសម្រេចការលក់មកឲ្យក្លឹបអង់គ្លេស ខ្សែប្រយុទ្ធស្លាបខាងលើ បានឈរជើង ៧៤ ប្រកួតឲ្យក្លឹបនៅទីក្រុងទូរីន រកបាន ៩ គ្រាប់និង Assist ១០ លើក តែពេលវេលាអង្គុយបម្រុង ច្រើនជាងការជាប់ជម្រើសដំបូង។ ខណៈមកក្លឹបនៅអង់គ្លេស ត្រឹមរយៈពេលខ្លី ឈរជើងដល់ ៨៥ ប្រកួត រកបាន ១៣ គ្រាប់និង Assist ១៩ លើកឯណោះ។
តាមការឲ្យដឹងពី Kulusevski បញ្ជាក់ថា៖ “ខ្ញុំបានឆ្លងកាត់រយៈពេល ៦ ខែនៅ Juventus ដែលជាអារម្មណ៍ដ៏លំបាក ព្រោះបានផ្តល់ឲ្យខ្ញុំនៅជីវិតដែលយើងខិតខំហ្វឹកហាត់ ហើយត្រូវអង្គុយមើលកីឡាករដទៃលេងខុសតំណែង មិនមែនជាខ្សែប្រយុទ្ធស្លាបផងមកលេងកន្លែងរបស់យើង”។
លោកបន្តថា៖ “ពេលនោះខ្ញុំពិតជាអាម៉ាស់ខ្លាំងណាស់ អ្នកខ្លះនិយាយថា ខ្ញុំរាងយឺត ខ្ញុំធ្វើមិនបានល្អ តែត្រឹមត្រូវគឺវាជារឿងធម្មតា នេះជាធម្មជាតិមនុស្ស រហូតដល់ពេលមួយដែលខ្ញុំទទួលដំណឹងថា Tottenham ចាប់អារម្មណ៍ ខ្ញុំក៏បានសួរនាំរកជើងហោះហើរ ធ្វើការផ្លាស់ប្តូរភ្លែត”៕
