អ្នកចាត់ការជម្រើសជាតិអង់គ្លេសលោក Gareth Southgate បានបញ្ជក់ច្បាស់ ថានឹងមិនស្តាប់សំណើការងារថ្មីពីទ្រនំខាងណាទាំងអស់ រហូតដល់ចប់ព្រឹត្តិការណ៍ ERUO 2024 នេះជាការឆ្លើយតបពាក់ព័ន្ធនឹងចចាមអារ៉ាមដែលផ្សារភ្ជាប់ឈ្មោះរបស់លោក ទៅកាន់ក្លឹបបិសាចក្រហម Manchester United ដែលអនាគត Erik ten Hag នៅទីនោះមិនប្រាកដប្រជា។
គ្រូវ័យ ៥៣ ឆ្នាំយប់មិញទើបតែដឹកនាំតោកំណាចទទួលលទ្ធផលមិនល្អ ក្រោមថ្វីជើងភ្ញៀវប្រេស៊ីលនៅជំនួបមិត្តភាព ០-១។ ការលើកឡើងពី Southgate៖ “ខ្ញុំមើលឃើញ ២ ចំណុចពេលនេះ មួយគឺខ្ញុំកំពុងជាចអ្នកចាត់ការអង់គ្លេស ហើយមានបន្ទុកព្យាយាមជួយក្រុមឈ្នះជើងឯក European Championship”។
លោកបន្ត៖ “មួយផ្សេងទៀតគឺ Manchester United កំពុងមានអ្នកចាត់ការដ៏ល្អមួយហើយ ខ្ញុំគិតថាវាតែងតែជាការមិនគោរព ចំពោះដំណឹងសង្ស័យត្រង់កន្លែងដែលមានអ្នកចាត់ការនៅឈរជើង ណាមួយខ្ញុំជាប្រធានសមាគម LMA ម្ល៉េះក៏អត់មានពេលច្រើនទៅគិតលើរឿងអស់នោះដែរ”។
គួរឲ្យដឹងថា កាលវិភាគប្រកួតបន្ទាប់គឺនៅ Wembley ទៀតហើយសម្រាប់ពួកគេ ដែលត្រូវបន្តទទួលភ្ញៀវបែលហ្សិក ជាប្រកួតមិត្តភាពដដែល។ មុនរង់ចាំដល់ខែមិថុនា ជាការជួបកម្តៅសាច់ដុំទល់បូស្នី ត្រៀមមុនប្រកួត EURO មកដល់៕
