ក្លឹប Barcelona បានបញ្ចប់តំណែងអ្នកចាត់ការទូទៅលោក Xavi Hernandez ចេញជាផ្លូវការណ៏ហើយ ខណៈក្លឹបយក្សកាតាឡាន់កំបុងសម្លឹងចង់បានអតីតគ្រូបង្វឹក Bayern Munich លោក Hansi Flick មកជំនួសរូបលោក។ Legend របស់ក្លឹបលោក Xavi បច្ចុប្បន្នមានវ័យ៤៤ឆ្នាំ នឹងទទួលបន្ទុកដឹកនាំ Barcelona ធ្វើការប្រកួតជាលើកចុងក្រោយនៅថ្ងៃអាទិត្យ នៅពេលដែលពួកគេធ្វើជាម្ចាស់ផ្ទះទទួលក្រុម Sevilla ក្នុងការប្រកួត La Liga ចុងក្រោយនៃរដូវកាលនេះ។

គួរកត់សម្គាល់ថាគ្រូបង្វឹកសញ្ជាតិអស្បាញរូបនេះមានកុងត្រាជាមួយក្លឹបរហូតដល់ឆ្នាំ ២០២៥ និងបានគេជូនដំណឹងអំពីការសម្រេចចិត្តពីអនាគតរបស់ខ្លួនជាមួយក្លឹបដោយបានជួបជាមួយប្រធានក្លឹបលោក Joan Laporta និងនាយកផ្នែកកីឡា(Sporting Director)គឺលោក Deco កាលពីថ្ងៃសុក្រ គិតជាពេលវេលាយ៉ាងហោចណាស់១ខែកន្លងទៅបន្ទាប់ពីយល់ព្រមបន្តនៅ ប៉ុន្តែអ្វីៗបានផ្លាស់ប្តូរមិននឹកស្មានដល់។

រំលឹកដល់ខែមសាកន្លងទៅលោក Xavi ត្រូវបានប្រធានក្លឹបខាងលើ បញ្ចុះបញ្ចូលអោយបន្តនៅជាមួយក្រុមបន្ទាប់ពីកំលុងខែមករាកន្លងទៅអតីតកាពីតែនក្រុម Barcelona ថាខ្លួននឹងចាកចេញពីទឹកដី Camp Nou ។ទោះយ៉ាងណាការអត្ថាធិប្បាយថ្មីៗរបស់លោក Xavi បាននិយាយរិះគន់ដោយបើកចំហអំពីការតស៊ូផ្នែកហិរញ្ញវត្ថុរបស់ក្លឹប បានធ្វើអោយលោក Laporta មានវ័យ៦២ឆ្នាំ ខឹងសម្បារ ហើយទីបំផុត Barcelona បានសរសេរយ៉ាងខ្លីថាអរគុណលោក Xavi សម្រាប់ការងាររបស់គាត់ជាគ្រូបង្វឹកចាប់តាំងពីចូលកាន់តំណែងក្នុងឆ្នាំ ២០២១ ។

ទោះបីជាត្រូវបានក្លឹបបញ្ចប់តំណែងមុនការគ្រោងទុក Xavi បានសរសេរដោយបើកចំហរនៅលើបណ្តាញសង្គមថាៈវាពិតជាពិបាកធ្វើចិត្តក្នុងការចាកចេញពីក្លឹបដែលជាអ្នកផ្តល់កំណើតអោយខ្ញុំ ប៉ុន្តែខ្ញុំមានមោទនភាពយ៉ាងខ្លាំងបន្ទាប់ពីរយៈពេល ២ ឆ្នាំកន្លះព្រោះ Bacelona ប្រៀបបីដូចជាគ្រួសារទីពីររបស់ខ្ញុំអញ្ចឹងដែរ ។ដូច្នេះក្រោយការប្រកួតនៅថ្ងៃអាទិត្យនេះចប់ ខ្ញុំនឹងនៅតែជាអ្នកគាំទ្រ Barcelona ដដែល។