ខ្សែប្រយុទ្ធចាស់វស្សា Olivier Giroud ថ្មីៗនេះ បានបង្ហើបប្រាប់ឲ្យដឹងថា ការប្រកួតពានរង្វាន់ Euro ឆ្នាំ២០២៤ នាពេលខាងមុខនេះ អាចនឹងក្លាយជាការប្រកួតអន្តរជាតិលើកចុងក្រោយរបស់ខ្លួន ជាមួយនឹងក្រុមជម្រើសជាតិបារាំង។

ជាក់ស្តែង Giroud គឺជាអ្នករកគ្រាប់បាល់បញ្ចូលទីច្រើនជាងគេរបស់ក្រុមជម្រើសជាតិ ដោយអាចរកបាន ៥៧គ្រាប់ ក្នុងការបង្ហាញខ្លួនសរុប ១៣១ ប្រកួត.

ប៉ុន្តែទោះជាយ៉ាងណាក៏ដោយ វាត្រូវបានគេរំពឹងទុកថា Giroud អាចនឹងសម្រេចចិត្តចាកចេញពីក្លិប AC Milan ដើម្បីផ្ទេរទៅកាន់ក្របខ័ណ្ឌ MLS នៅរដូវក្តៅខាងមុខនេះ ស្របពេលអ្នកជំនាញផ្នែកទីផ្សារ​ លោក Fabrizio Romano ក៏បានបង្ហើបថាកីឡាករវ័យ ៣៧ឆ្នាំរូបនេះ ក៏បានចុះកិច្ចព្រមព្រៀងផ្ទាល់ខ្លួន ដើម្បីផ្ទេរទៅកាន់ក្លិប Los Angeles FC រួចរាល់ហើយផងដែរ។

ជុំវិញការសម្រេចចិត្តនេះ ហាក់បានជះឥទ្ធិពលចំពោះអនាគតរបស់ Giroud នៅក្នុងក្រុមជម្រើសជាតិខ្លាំងមែនទែន ដោយមានរបាយការណ៍ជាច្រើនរាយការណ៍ថា​ ការប្រកួត Euro នាចុងឆ្នាំនេះ អាចនឹងជាពេលចុងក្រោយម្រាប់ខ្សែប្រយុទ្ធរុបនេះ ។

មិនតែប៉ុណ្ណោះ Giroud បានប្រាប់ Téléfoot ថា៖ ” វាអាចជាការប្រកួតអន្តរជាតិលើកចុងក្រោយរបស់ខ្ញុម។ បច្ចុប្បន្នគ្មានការសម្រេចចិត្តណាមួយណាឡើយ។ ដូចដែលខ្ញុំបាននិយាយ ទីបញ្ចប់កាន់ខិតជិតមកដល់ហើយ។ អ្នកត្រូវតប្រើប្រាស់ពេលវេលាឲ្យបានច្រើនបំផុត តាមដែលអាចធ្វើបាន” ៕