អ្នកចាត់ការ Real Madrid លោក Carlo Ancelotti បានឆ្លើយតបនឹងចចាមអារ៉ាម ជុំវិញដំណឹងនៃការចាកចេញរបស់ខ្សែប្រយុទ្ធឆ្នើម Vinicius Jr. នារដូវក្ដៅខាងមុខ។

កីឡាករប្រេស៊ីលរូបនេះ ទទួលរងនូវការរើសអើ.ងជាច្រើនលើកច្រើនសារ ក្នុងរយៈពេល២រដូវកាលចុងក្រោយ ពីការស្រែកពីអ្នកគាំទ្រនៅកីឡដ្ឋាន និងនៅលើបណ្ដាញសង្គម។

អ្នកចាត់ការ Ancelotti ត្រូវបានអ្នកសារព័ត៌មានសួរអំពីស្ថានភាពរបស់ Vinicius ដែលបានសម្រក់ទឹកភ្នែកក្នុងសន្និសីទសារព័ត៌មាន មុនការប្រកួតចាប់ផ្តើមរវាងប្រេស៊ីល និងអេស្ប៉ាញ ដែលនាំឱ្យមានលេចឮនៃដំណឹងចាកចេញរបស់ កីឡាករប្រេស៊ីលរូបនេះ។

លោក Ancelotti បាននិយាយថា៖​ “សម្រាប់ Vinicius វាប្រាកដណាស់ថា ការប្រឆាំងនឹងការរើសអើ.ង ជាបញ្ហាដ៏សំខាន់។ គេបានយកចិត្តទុកដាក់ខ្លាំង ហើយនោះជាអ្វីដែលយើងទាំងអស់គ្នាត្រូវតែធ្វើ យ៉ាងយកចិត្តទុកដាក់ចំពោះរឿងនេះ”។

“ខ្ញុំមិនបារម្ភអំពីដំណឹងនៃការចាកចេញរបស់ Vinicius​ ទេ។ រឿងដែលខ្ញុំបារម្ភនោះគឺ គេមិនអាចបានលេងនាថ្ងៃស្អែក។ នោះជារឿងដែលធ្វើឱ្យខ្ញុំបារម្ភ”។

Vinicius មិនមានឈ្មោះក្នុងបញ្ជីកីឡាករសម្រាប់ការប្រកួតទល់នឹង Athletic Bilbao នោះទេ​ ដោយសារគេរងពិន័យមួយប្រកួត ក្រោយទទួលបានកាតលឿងនៅ La Liga ៥ដង៕