ក្លិបបិសាចក្រហម Manchester United ត្រូវបានគេរាយការណ៍មកថា កំពុងរៀបចំផ្តល់ជូនកិច្ចសន្យាថ្មីបន្ថែមទៀត សម្រាប់ Scott McTominay បន្ទាប់ពីបានមើលឃើញថាខ្សែបម្រើរូបនេះ កំពុងក្លាយជាផ្នែកដ៏សំខាន់សម្រាប់ក្រុម នៅរដូវកាលនេះ។

រំលឹកផងដែរថា កីឡាករសញ្ជាតិស្កុតឡេនរូបនេះ ត្រូវបានភ្ជាប់ទំនាក់ទំនងខ្លាំង ជាមួយនឹងការចាកចេញពីក្លិបបិសាចក្រហមកាលពីរដូវក្តៅមុន ដោយក្រុម West Ham United ត្រូវបានគេជឿជាក់ថាបានបង្ហាញការចាប់អារម្មណ៍ខ្លាំង ក្នុងការចុះហត្ថលេខាលើរូបគេ។

ប៉ុន្តែទោះជាយ៉ាងណាក៏ដោយ McTominay​ បានសម្រេចចិត្តបន្តស្នាក់នៅក្លិប និងបានក្លាយជាផ្នែកដ៏សំខាន់មួយសម្រាប់ក្រុមរបស់លោក Erik ten Hag នៅរដូវកាលនេះ ដោយបង្ហាញខ្លួន ៣៤ លើក រកបាន ៩ គ្រាប់ និងបញ្ជូនបាល់ឱ្យមិត្តរួមក្រុមចំនួន ៣ លើកបន្ថែមទៀត។

ហើយឥឡូវនេះ យោងតាមសារព័ត៌មាន Daily Star បានឲ្យដឹងថា Man United ហាក់បានធ្វើការសម្រេចចិត្តរួចរាល់ហើយលើអនាគតរបស់ខ្សែបម្រើរូបនេះ ដោយកំពុងរៀបចំផ្តល់ជូនរូបគេនូវកិច្ចសន្យាថ្មីបន្ថែមទៀត នៅទឹកដី Old Trafford ។

ប្រភពដដែលនេះ បានអះអាងទៀតថា ម្ចាស់ក្លិបថ្មី លោក Sir Jim Ratcliffe បានផ្ដល់ភ្លើងខៀវសម្រាប់កិច្ចសន្យាដែលមានតម្លៃរហូតដល់ទៅ ១២០ ០០០ ផោន ក្នុងមួយសប្តាហ៍ សម្រាប់ McTominay​ ពោលគឺនឹងធ្វើឲ្យប្រាក់ឈ្នួលរបស់គេកើនឡើងទ្វេដងឯណោះ៕