អ្នកចាត់ការលោក Carlo Ancelotti បានប្រាប់នៅសន្និសីទសារព័ត៌មានកន្លងទៅ អំពីកម្រិតតាក់តិចលេងនៅក្របខ័ណ្ឌ La Liga ដោយជឿថាវាខ្ពស់ជាងកម្រិតនៅ Premier League ឆ្លើយតបនឹងការឈ្នះថ្មីថ្មោង ៤-០ ទៅលើក្លឹប Celta Vigo។ នេះបន្ទាប់តែគ្រូសញ្ជាតិអ៊ីតាលី ធ្លាប់បានហែលកាត់ការដឹកនាំក្លឹបកំពូលជាច្រើននៅទូទាំងតំបន់អឺរ៉ុប។
នៅ Premier League ក៏ Ancelotti ធ្លាប់បានដឹកដែរ ដូចកាលជាមួយតោខៀវ Chelsea និង Everton ហើយលោកបានបង្ហាញចំណាប់អារម្មណ៍ប្រៀបធៀបប្រាប់ទៅកាន់សារព័ត៌មាន AS យ៉ាងដូច្នោះថា៖ “វាខុសប្លែកពីគ្នា មិនមែនថាខាងណាល្អឬអាក្រក់ជាងទេ គ្រាន់តែមានតាក់តិចតិចជាងប៉ុណ្ណឹងឯង”។
លោកបន្ត៖ “នៅកម្រិតតាក់តិច សម្រាប់ La Liga គឺល្អខ្លាំងជាងនៅលីគកំពូលអង់គ្លេស នេះបើយើងនិយាយអំពីល្បឿនវិញ គឺលីគអង់គ្លេសល្អជាងវិញ តែនៅអេស្ប៉ាញបាល់គេលេងដោយគុណភាពតាក់តិចខ្លាំងជាង”។
គួរឲ្យដឹងថា ក្លឹបនៅអេស្ប៉ាញ សេសសល់ ៤ ទាំងព្រមនៅពានអឺរ៉ុបលំដាប់មួយលំដាប់ពីរ មាន Atletico Madrid, Barcelona និង Villarreal តែបើពួកគេមិនអាចឆ្លងផុតជើងទី ២ ខាងមុខទេនោះ ក៏នឹងសម្រេចថានៅសល់ត្រឹម Real Madrid មួយគត់ អាចបន្តរក្សាឈ្មោះនៅវគ្គ ៨ ក្រុមចុងក្រោយពានអឺរ៉ុបរដូវកាលនេះ៕
