ប្រធានក្លឹប Paris Saint-Germain លោក Nasser Al-Khelaifi បានបង្ហាញអំពីផែនការណ៍ក្លឹបកំពុងដើរ ក៏ដូចជាឱកាសក្នុងការឈ្នះពានរង្វាន់ Champions League ជាមួយឈុតក្មេងៗកំពុងមានក្នុងដៃ។ ជាការពិត វាជាការរៀបចំថ្មីសន្លាង ដ្បិតកន្លងមកតារាឆ្នើមចាស់វស្សាជាច្រើន បានចាកចេញជាបន្តបន្ទាប់ រួចអ្នកចុងក្រោយសំខាន់បំផុត គឺជា Kylian Mbappe។
ទន្ទឹមនឹង PSG ធ្វើបានល្អ យកឈ្នះទៅលើ Real Sociedad ឆ្លងមកដល់វគ្គ ៨ ក្រុមចុងក្រោយ ហើយវាក៏ជារដូវកាលចុងក្រោយដូចគ្នាសម្រាប់កីឡាករបារាំងខាងលើ ស្រាប់តែប្រធានក្លឹប បានប្រាប់ទៅRMC Sport យ៉ាងដូច្នោះ៖ “រឿងរ៉ាវ Champions League វាវែងឆ្ងាយណាស់ យើងបានចាប់ផ្តើមនៅដើមរដូវកាល យើងចង់បង្កើតក្រុមសម្រាប់អនាគត ក្រុមដែលអាចលេងជាមួយគ្នា ៦ ទៅ ៨ ឆ្នាំបន្ទាប់”។
លោកបន្តថា៖ “យើងមានក្រុមវ័យក្មេងបំផុតហើយនៅវគ្គ ៨ ក្រុម Champions League ក៏ជាក្រុមវ័យក្មេងបំផុតដែរ បើនិយាយអំពីក្លឹបកំពូលទាំង ១០ ប្រចាំតំបន់អឺរ៉ុប យើងពិតជាមានមោទកភាពណាស់ វាជារឿងល្អដែលយើងកំពុងនឹងដើរយុទ្ធសាស្រ្តមួយនេះ ជាមួយកីឡាករវ័យក្មេង និងកីឡាករវ័យក្មេងបារាំងផងដែរ”។
រំឭកឲ្យបងប្អូនបានដឹង ក្លឹបស្ថិតក្នុងទីក្រុងប៉ារីស មិនទាន់ស្គាល់ជាតិឈ្នះពាន UCL សូម្បីតែម្តងនៅឡើយ។ ឱកាសសារនេះ មើលទៅល្អគួរសម ត្រង់ការកក់មកកាន់វគ្គ ១/៤ ផ្តាច់ព្រ័ត្រ ក៏ជាមួយទម្រង់ដ៏ល្អបានហែលកាត់កន្លងមក តែទៅមុខអាចចាប់ឆ្នោតប៉ះគីឡូធ្ងន់ មិនទាន់ដឹងទុកជាមុន តួយ៉ាងមាន Real Madrid មាន Manchester City ជាដើមដែរ៕
