បើទោះបីខាង Arsenal បានយកឈ្នះទៅលើ Liverpool មែនពិត តែខ្សែបម្រើអង់គ្លេស Declan Rice នៅបន្តលាន់មាត់សរសើរចំពោះក្រុមដឹកនាំដោយលោក Jurgen Klopp ជាពិសេសដដែល ថាជាក្លឹបល្អដាច់គេនៅ Premier League រដូវកាល ២០២៣/២៤។
រំឭកថយក្រោយប៉ុន្មានថ្ងៃមុននោះ គ្រាប់បាល់របស់ Bukayo Saka Gabriel Martinelli និង Leandro Trossard បានជួយឲ្យ Arsenal យកឈ្នះទៅលើហង្ស ៣-១ នៅឯទឹកដីខ្លួនឯង Emirate Stadium។ សរុបមក Liverpool ពួកគេឈ្នះ ១៥ ស្មើ ៦ ចាញ់ ២ គត់ នៅសរុប ២៣ ប្រកួតឆ្លងកាត់។
ប្រាប់ទៅ beIN Sports កីឡាករអង់គ្លេសនិយាយ៖ “Liverpool ជាក្លឹបដ៏ល្អបំផុតនៅលីគ បើយើងមើលលើស្ថិតិរបស់ពួកគេ នេះគឺទើបតែជាការចាញ់លើកទី ២ ប៉ុណ្ណោះ យើងដឹងមុនហើយថាជាការប្រកួតដ៏ធំសារនេះ រយៈពេល ៩០ នាទីគ្រប់គ្នាព្យាយាមអស់ពីខ្លួនដើម្បីឈ្នះ ហើយទីបញ្ចប់គឺពួកយើងធ្វើបាន”។
បញ្ជាក់ឲ្យដឹង Liverpool កំពុងឈរកំពូលតារាងបណ្តោះអាសន្ន មាន ៥១ ពិន្ទុ នាំមុខពីលើ City សល់មួយប្រកួតក្នុងដៃមាន ៤៩ ពិន្ទុស្មើនឹង Arsenal ឈរលេខ ៣។ នេះបើក្លឹបដឹកនាំដោយលោក Pep Guardiola យកឈ្នះមួយប្រកួតខាងមុខ ក៏នឹងរំកិលមកឈរនៅចំណាត់ថ្នាក់កំពូលជាថ្មី៕
