បើទោះបីជាសះស្បើយពីបញ្ហារបួស តែ Arda Guler ហាក់មិនអាចត្រលប់មកចុះចូលជាមួយក្លឹប Real Madrid បានឡើយ នេះមានន័យថា ទំនេរជើង ក៏ប៉ុន្តែមិនទទួលបានការសម្រេចកោះហៅឲ្យចូលប្រកួតជាប់លាប់ពីអ្នកចាត់ការលោក Carlo Ancelotti។ ជាក់ស្ដែងបុរសវ័យ ១៨ ឆ្នាំ ទើបបង្ហាញវត្តមាននៅ Copa del Rey និង Supercopa នាមកីឡាករបម្រុង ត្រឹម ៦៧ នាទីប៉ុណ្ណោះ។
Guler គេបង្ហាញខ្លួនដំបូងនៅប្រកួតឲ្យអធិរាជស ទល់ក្លឹប Arandina ថ្ងៃមុន ត្រឹមឈ្មោះកីឡាករបម្រុង ហើយក៏ទទួលបានពេលវេលា ៨ នាទីចុងក្រោយទល់ Atletico នៅវគ្គ ៤ ក្រុមចុងក្រោយពាន Spanish Supercup។ យ៉ាងណានៅ ៣ ប្រកួតបន្តបន្ទាប់ទល់ Barcelona, AT Madrid និង Almeria ផ្សេងទៀត គឺបានត្រឹមបម្រុងប៉ុណ្ណោះ។
បើតាមរបាយការណ៍ Sports ចុះផ្សាយ លោក Ancelotti ដែលមិនជឿជាក់លើគុណភាពកីឡាករតួកគី ខាងលើ ហាក់ជំរុញចិត្តឲ្យយុវជនខាងលើ គិតគូរដល់ផ្លូវចាកចេញទៅវិញហើយ បើតាមមើលឃើញ។ ណាមួយកីឡាករផ្តោតចង់ទទួលបានឱកាសជាប់ឈ្មោះនៅពាន EURO នាពាក់កណ្តាលឆ្នាំផង។
ដ្បិតបើសុពលភាពកុងត្រាសេសសល់ដល់ចុងខែមិថុនា ឆ្នាំ ២០២៩ តែកីឡាករដែល Madrid យកមកក្នុងតម្លៃ ២០ លានអឺរ៉ូ ពី Fenerbahce ហាក់ធ្លាក់តម្លៃទៅវិញ មកសល់ត្រឹមតែជាង ១៥ លានអឺរ៉ូ។ មិនទាន់ច្បាស់អំពីក្លឹបដែលនឹងចង់បាន Guler ទៅចូលរួមនៅខែមករា សេសសល់ពេលមួយសប្តាហ៍សម្រាប់ចរចាខាងមុខនោះទេ៕
