ខ្សែការពារក្រុម Tottenham Hotspur កីឡាករ Eric Dier បានចូលរួមជាមួយក្រុម Bayern Munich ក្នុងលក្ខខណ្ឌខ្ចីជើងរហូតដល់ដំណាច់រដូវកាលនេះ។ ព័ត៌មានលម្អិតអំពីចំណុចហិរញ្ញវត្ថុ មិនត្រូវបានបង្ហាញដោយក្លិបបាល់ទាត់ទាំងពីរឡើយ ស្របសារព័ត៌មានរបស់អង់គ្លេសបានបញ្ជាក់ថាក្រុម Bayern Munich បានចំណាយ ៣.៥ លានអឺរ៉ូ (៣.៨៤ លានដុល្លារសហរដ្ឋអាមេរិក) ទៅឱ្យ Spurs សម្រាប់កីឡាករវ័យ ២៩ ឆ្នាំរូបនេះ។

កីឡាករ Eric Dier សល់កុងត្រាត្រឹមរយៈពេល ៦ ខែប៉ុណ្ណោះជាមួយក្លិបបាល់ទាត់ Tottenham Hotspur ដោយបានបង្ហាញខ្លួនច្រើនជាង ៣០០ ប្រកួតសម្រាប់ក្រុមចាប់តាំងពីឆ្នាំ២០១៤ មក។ យ៉ាងណាមិញ ក្រោមការដឹកនាំរបស់លោក Ange Postecoglou ចាប់តាំងពីខែមិថុនា ឆ្នាំ២០២៣ មក កីឡាករ Eric Dier បង្ហាញខ្លួនបានត្រឹម ៤ ប្រកួតប៉ុណ្ណោះ។

ក្រុម Bayern Munich បាននិយាយពីកីឡាករ Eric Dier ថា៖

គេគឺជាកីឡាករ ដែលយើងចង់បានយូរហើយ ដោយយើងចង់បានរូបគេក្នុងទីផ្សារដោះដូរកីឡាករខែនេះ។ Eric នឹងពង្រឹងប្រព័ន្ធការពាររបស់ពួកយើង។ សមត្ថភាព និងបទពិសោធន៍លក្ខណៈអន្តរជាតិរបស់រូបគេនឹងជួយក្រុមទាំងនៅលើទីលាន និងបន្ទប់ផ្លាស់សម្លៀកបំពាក់។

កីឡាករ Eric Dier ដើមឡើយលេងក្នុងតំបន់បម្រើការពារក្រោមការដឹកនាំរបស់លោក Mauricio Pochettino ប៉ុន្តែកីឡាកររូបនេះក៏អាចលេងក្នុងតំបន់ការពារកណ្ដាលផងដែរ។ ការផ្ទេរទៅកាន់ក្រុម Bayern Munich នេះមានន័យថាកីឡាករ Eric Dier នឹងត្រូវលេងជាមួយមិត្តរួមក្រុមចាស់របស់រូបគេគឺកីឡាករ Harry Kane ដែលកំពុងធ្វើព្យុះធ្វើភ្លៀងនៅប្រទេសអាល្លឺម៉ង់។

គួរបញ្ជាក់ផងដែរថា ក្រុម Bayern Munich កំពុងស្ថិតនៅលេខរៀងទី២ នៃកំពូលតារាង Bundesliga ដោយតាមពីក្រោយក្រុម Bayer Leverkusen ៤ ពិន្ទុ ដោយសល់មួយប្រកួតក្នុងដៃ៕