Bruno ថា Garnacho អត់សមឈ្នះ MOTM តែគួរជាមិត្តរួមក្លឹបម្នាក់នេះ

នៅប្រកួតក្នុងទឹកដី Goodison Park កាលពីទៀបភ្លឺថ្ងៃអាទិត្យ ក្លឹបម្ចាស់ផ្ទះបានបរាជ័យស្ពឹកមុខ ០-៣ ក្រោមថ្វីជើង Man United នេះបើទោះបីខាងស្ករគ្រាប់ខៀវ មានឱកាសគ្រប់គ្រងបាល់ច្រើន ឱកាសស៊ុតច្រើនជាង ក៏មិនអាចបញ្ចប់ទីសូម្បីមួយ។

យើងសារថយក្រោយទៅមើលស្ថិតិជារួមប្រកួតនោះ Everton ដឹកបាល់លេង ៥១ ភាគរយ បញ្ជូន ៤៤៣ ប៉ះ ស៊ុតសរុប ២៤ លើក ចំគោលដៅ ៦ រកបាន ០ គ្រាប់ ស្របពេលដែលខាងភ្ញៀវ ស៊ុតចំគោលដៅ ៤ លើក ក្នុងចំណោមការស៊ុតសរុប ៩ លើក ចូលទី ៣ គ្រាប់។ ចាប់អារម្មណ៍បំផុតគ្រាប់បើកឆាកតាំងនាទីទី ៣ របស់យុវជនឆ្នើមអាហ្សង់ទីន Alejandro Garnacho ដែលជាគ្រាប់បាល់លោតផ្កាប់ចាន ឬយើងហៅថា Bicycle Kick មុនកើតគ្រាប់ប៉េណាល់ទីស៊ុតដោយ Marcus Rashford និងការឆ្កឹះផុតដៃអ្នកចាំទី ពីជើង Anthony Martial នៅតង់ទីពីរ។
បញ្ចប់ ៩០ នាទីលើទីលាន Garnacho ដែលត្រូវបានគេសរសើរមិនដាច់ពីមាត់ ជាអ្នកឈ្នះនាមកីឡាករល្អបំផុតប្រចាំការប្រកួត ឬ MOTM Award តែការយល់ឃើញរបស់ប្រធានក្រុម Bruno Fernandes មិនមើលឃើញយ៉ាងដូច្នោះទេ។

បើទោះបីដឹងថា Garnacho ជាអ្នកគាំទ្រកីឡាកររួមជាតិសាសន៍ឯង Cristiano Ronaldo តែរបៀបលើកឡើង ក្នុងភាពជាអ្នកដឹកនាំរបស់ខ្សែបម្រើ Bruno បានយល់ឃើញផ្សេង ហើយចុចឈ្មោះយុវជនវ័យ ១៨ ឆ្នាំ និងទើបទទួលបានឱកាសមកបង្ហាញខ្លួនជូនឈុតធំជាលើកដំបូង Kobbie Mainoo ជាអ្នកសក្តិសមបំផុត។

Wolf246.Vip ពិភពកំសាន្តល្អផ្តាច់មុខនៅកម្ពុជា

យុវជនកម្ពស់ ១,៧៥ ម៉ែត្រ ជាប់ជម្រើសដំបូង រហូតដល់នាទី ៧២ ទើបប្តូរចេញ និងជំនួសចូលដោយ Sofyan Amrabat។ ក៏ប៉ុន្តែទម្រង់របស់គេ តាំងពីវគ្គទីមួយនោះ បើមើលឲ្យជ្រៅ វិភាគឲ្យជាក់ គឺពិតជាល្អ ទាំងការការពារ ទាំងការបង្កើតឱកាសទៅប្រព័ន្ធប្រយុទ្ធ។

ធំបំផុតគឺការ Clear ឱកាសរកគ្រាប់បាល់តាមស្មើរបស់ Everton ដែលបាល់ផុតអស់អ្នកចាំទី Andre Onana នឹងបម្រុងចូលទីទៅហើយ តែល្អកីឡាករកូនកាត់អង់គ្លេស-ហ្គាណា រត់ទៅស្លាយថ្ពក់ផ្តាច់បាល់នោះចេញទាន់ពេលវេលា។ ជាងនេះម្ចាស់អាវលេខ ៣៧ ក៏មើលទៅលេងដោយភាពជឿជាក់ ឥតញញើតខាងគូប្រជែង ដ្បិតបើបទពិសោធន៍នៅក្មេងខ្ចី។

មតិលើកឡើងរបស់ Bruno៖ “Garnacho គេមិនមែនជាកីឡាករល្អនៅឡើយទេ តែគេមានអនាគតដ៏ធំនៅពេលខាងមុខ យើងរំពឹងទទួលបានច្រើនចេញពីគេ សាមីខ្លួនក៏ដូចគ្នា ដឹងថាគេអាចបង្កើតសមិទ្ធផលច្រើនជាងនេះ”។

លោកបន្ត៖ “ខ្ញុំតែងតែនិយាយអំពី Kobbie គេសក្តិសមនឹងទទួលបាន MOTM គេជាកីឡាករដ៏អស្ចារ្យម្នាក់ គ្រាន់ថាមនុស្សជាច្រើន បាននិយាយអំពី Garnacho ត្រង់គេជាអ្នករកបានគ្រាប់បាល់ តែជារួមអ្វីដែល Kobbie ផ្តល់មកកាន់ការប្រកួត អ្វីដែលគេផ្តល់ជូនក្រុម គឺគ្រប់គ្នាបានដឹងច្បាស់ណាស់”។

ពាក់ព័ន្ធនឹងភាពចម្រូងចម្រាសនៃការផ្តល់ជូនពានឯកត្តជន MOTM នេះដែរ ក៏ត្រូវបានអ្នកគាំទ្រនឹកដល់សម្តី Karim Benzema ធ្លាប់លើកឡើងកាលឆ្នាំ ២០២១ គឺស្រដៀងនឹងការវាយតម្លៃពេលនេះអ៊ីចឹង។ អតីតសមាជិក Madrid និយាយកាលនោះ៖ “បាល់ទាត់សព្វថ្ងៃហាក់ក្លាយជាប្រកួតមួយដែលកីឡាករអាចលេងមិនបានល្អរយៈពេល ៩០ នាទី ហើយត្រឹមការរកគ្រាប់បាល់របស់គេមួយគ្រាប់ ក៏អាចមានឈ្មោះជា Man of the Match”។

ខ្លាចាស់សញ្ជាតិបារាំងបន្ថែម៖ “ខ្ញុំអត់ចង់ក្លាយខ្លួនឯងជាកីឡាកររបៀបហ្នឹងទេ ពោលចង់ជាខ្សែប្រយុទ្ធគំរូមួយ ដោយមិនត្រឹមតែដឹងរបៀបបញ្ចប់ទី តែក៏ដឹងអំពីរបៀបលេងជារួមផងដែរ មួយប៉ះពីរ ការបម្លាស់ទី គ្រប់យ៉ាងគឺត្រូវដឹងច្បាស់”៕

ប្រភព៖ បរទេស