Manchester United អាចនឹងត្រូវប្រឈមមុខនឹងសេចក្តីសម្រេចដ៏សំខាន់មួយពាក់ព័ន្ធនឹងប្រធានក្រុម Bruno Fernandes ក្នុងទីផ្សារដោះដូរកីឡាករខាងមុខនេះ ខណៈពេលដែលមានការព្យាករណ៍ភ្ជាប់គាត់ទៅនឹងការចាកចេញ និង Bruno Guimaraes របស់ Newcastle United ត្រូវបានគេចាត់ទុកថាជាជម្រើសជំនួសសក្តិសម។ ក្នុងបទសម្ភាសន៍ផ្តាច់មុខជាមួយ GOAL អតីតខ្សែប្រយុទ្ធរបស់ Manchester United និង Newcastle លោក Michael Owen បានផ្តល់អនុសាសន៍យ៉ាងច្បាស់ថា ក្លឹបមិនគួរធ្វើការផ្លាស់ប្តូរបែបនេះឡើយ ហើយគួរតែរក្សាទុកខ្សែបម្រើស្នូលរបស់ខ្លួនឲ្យបានគ្រប់វិធី។

Fernandes វ័យ 31 ឆ្នាំ បានក្លាយជាតួអង្គដ៏សំខាន់ចាប់តាំងពីចូលរួមជាមួយ Manchester United ក្នុងឆ្នាំ 2020។ គាត់បានបង្ហាញខ្លួនជាង 320 ប្រកួត ហើយក្លាយជាកីឡាករដែលឈានដល់ 100 គ្រាប់បាល់ និង 100 assists លឿនបំផុតក្នុងប្រវត្តិសាស្ត្រក្លឹប។ បន្ទាប់ពីទទួលតំណែងប្រធានក្រុមពី Harry Maguire គាត់បានបង្ហាញភាពដឹកនាំយ៉ាងល្អក្នុងពេលក្រុមជួបការលំបាក ហើយបន្តបង្ហាញសមត្ថភាពខ្ពស់ ទោះបីជាក្រុមមិនមានទម្រង់លេងល្អក៏ដោយ។ សមត្ថភាពបង្កើតឱកាស ការបាញ់បាល់ និងការខិតខំប្រឹងប្រែងរបស់គាត់ មានតួនាទីសំខាន់ក្នុងការជួយឲ្យ Manchester United ត្រលប់មកវិញ ដល់ចំណាត់ថ្នាក់លេខ 3 នៅ Premier League និងមានគោលដៅវិលត្រឡប់ទៅ Champions League។

ទោះជាយ៉ាងណា ដោយសារអាយុកាន់តែចាស់ និងការចាប់អារម្មណ៍ពី Saudi Pro League ដែលផ្តល់កិច្ចសន្យាដែលមានប្រាក់ខែខ្ពស់ ក៏មានសំណួរអំពីអនាគតរយៈពេលវែងរបស់គាត់។ Fernandes ក៏ធ្លាប់បានបញ្ជាក់ថា ក្លឹបអាចនឹងបើកចិត្តលក់គាត់ក្នុងឆ្នាំ 2025 ហើយការផ្តល់ជូនស្រដៀងគ្នាអាចកើតឡើងវិញក្នុងឆ្នាំ 2026។ ការចាកចេញរបស់ Casemiro ដោយគ្មានតម្លៃផ្ទេរ ក៏អាចបង្កើនតម្រូវការក្នុងការពង្រឹងតំបន់កណ្ដាលផងដែរ ដែលជាកត្តាដែលជំរុញពាក្យចចាមអារ៉ាមអំពី “Bruno trade” ជាមួយ Guimaraes ដែលមានកិច្ចសន្យាជាមួយ Newcastle រហូតដល់ឆ្នាំ 2028។ ទោះបីជា Newcastle បដិសេធពាក្យចចាមអារ៉ាមនេះ ក៏គុណភាពរបស់ខ្សែបម្រើប្រេស៊ីលរូបនេះនៅតែធ្វើឲ្យគាត់ក្លាយជាគោលដៅគួរឱ្យចាប់អារម្មណ៍សម្រាប់ក្លឹបដែលចង់លេងនៅអឺរ៉ុប។

Owen ក្នុងតួនាទីជាអ្នកតំណាង Casino.org នៅចក្រភពអង់គ្លេស បានបញ្ជាក់យ៉ាងច្បាស់ថា Manchester United មិនគួរជំនួស Fernandes ដោយ Guimaraes ឬនរណាម្នាក់ទៀតឡើយ។ គាត់បាននិយាយថា “គាត់ល្អបំផុតម្នាក់នៅក្នុង Premier League។ គាត់លើសពីកីឡាករ Manchester United ផ្សេងៗទាំងអស់អស់រយៈពេលជាច្រើនឆ្នាំ… ហើយឥឡូវនេះ ក្រុមកំពុងលេងល្អ គាត់ក៏លេងល្អជាងមុនទៀតផង”។ Owen បានព្រមានថា បើគ្មាន Fernandes ក្រុមនឹង “ទទួលរងផលប៉ះពាល់យ៉ាងខ្លាំង” ហើយបន្ថែមថា គាត់ជាកីឡាករដែល “មិនអាចជំនួសបាន” ក្នុងបាល់ទាត់ពិភពលោក។

ទោះបីជាការលក់អាចនាំចូលប្រាក់ប្រហែល £100 លានក៏ដោយ Owen ជឿថាតម្លៃលើទីលានមានសារៈសំខាន់ជាងប្រាក់។ “បើខ្ញុំជាអ្នកគ្រប់គ្រង Manchester United ខ្ញុំនឹងគិតថា ‘យើងអាចទទួលបានប្រាក់ច្រើន ប៉ុន្តែគាត់សំខាន់ណាស់សម្រាប់យើង’”។ ខណៈដែលក្រុមកំពុងមានទម្រង់ល្អឡើងវិញ Owen ផ្តល់អនុសាសន៍ឲ្យ Fernandes បន្តលេងជាមួយក្លឹបរយៈពេល 3 ឬ 4 រដូវកាលបន្ថែម ជំនួសឲ្យការលក់ចេញ។ គាត់ក៏សរសើរ Guimaraes ប៉ុន្តែបានបញ្ជាក់ថា កីឡាករទាំងពីរមានលក្ខណៈខុសគ្នា ហើយ Fernandes មានសមត្ថភាពដឹកនាំ និងភាពច្នៃប្រឌិតដែលពិបាករកអ្នកជំនួសបាន។

សម្រាប់ Newcastle ដែលបច្ចុប្បន្នស្ថិតនៅចំណាត់ថ្នាក់ទី 12 និងកំពុងប្រយុទ្ធដើម្បីទទួលបានកៅអីអឺរ៉ុប Owen ក៏បានផ្តល់អនុសាសន៍ដូចគ្នាថា គួររក្សាទុក Guimaraes និងគ្រូបង្វឹក Eddie Howe ដែលគាត់ហៅថា “ជាម្នាក់ក្នុងចំណោមគ្រូបង្វឹកល្អបំផុត”។ បន្ទាប់ពីរដូវកាលមួយដែលមិនសូវលេចធ្លោ ការផ្លាស់ប្តូរធំៗអាចមិនមែនជាជម្រើសល្អក្នុង Premier League ដែលមានការប្រកួតប្រជែងខ្លាំង។ សមិទ្ធផលរបស់ Howe ក្នុងអតីតកាល ដូចជាការឈ្នះពាន និងនាំក្រុមទៅ Champions League គួរត្រូវបានផ្តល់ពេលវេលា មិនមែនបណ្តេញចេញឡើយ។